Shkolla Fillore Ibe Palikuqa
Shkolla Fillore Komunale „Ibe Palikuqa” është e vendosur në fshatin Bojanë, i cili shtrihet në pjesën veriperëndimore të Shkupit, në largësi prej rreth 23,4 km, përgjatë rrugës Shkup–Tetovë. Veprimtaria edukativo-arsimore zhvillohet në kuadër të shkollës qendrore në fshatin Bojanë dhe dy shkollave periferike në fshatrat Llaskarcë dhe Paniçarë.
Shkollat në Bojanë, Llaskarcë dhe Paniçarë kanë një histori të gjatë në zhvillimin e arsimit në këtë rajon. Ato janë themeluar në vitin 1945 si shkolla fillore katërvjeçare. Në vitin 1967, në Bojanë u hap shkolla tetëvjeçare, ndërsa në vitin 1970 edhe shkollat periferike në Llaskarcë dhe Paniçarë u shndërruan në shkolla tetëvjeçare. Që nga themelimi e deri më sot, shkollat kanë kaluar nëpër faza të ndryshme zhvillimi, duke kontribuar vazhdimisht në edukimin dhe arsimimin e brezave të rinj.
Me rritjen e numrit të nxënësve dhe zhvillimin e popullatës, është paraqitur nevoja për zgjerimin dhe përmirësimin e hapësirave shkollore. Objekti shkollor në Bojanë është ndërtuar në vitin 1935, ndërsa në vitin 1967 janë ndërtuar edhe tri klasa të reja. Sipas të dhënave ekzistuese, shkolla qendrore disponon me nëntë klasa mësimore, disa prej të cilave nuk i plotësojnë plotësisht normat pedagogjike për zhvillimin e procesit edukativo-arsimor. Gjithashtu, shkolla ka pesë hapësira zyrash për nevojat e personelit dhe funksionimin e institucionit, përfshirë hapësirat për drejtorin, shërbimin profesional pedagogjik/psikologjik, bibliotekën dhe sekretarinë me arkën.
Shkolla qendrore, së bashku me njësitë shkollore, ka pasur një sipërfaqe shfrytëzuese prej rreth 4622 m2, sipas të dhënave të mëparshme. Këto të dhëna infrastrukturore duhet të interpretohen duke marrë parasysh ndryshimet e realizuara ndër vite në objektet shkollore.
Një zhvillim i rëndësishëm në infrastrukturën shkollore është ndërtimi dhe vënia në përdorim e objektit të ri shkollor në fshatin Paniçarë. Objekti i ri, i vendosur në një lokacion të ri brenda fshatit, është lëshuar në përdorim në janar të vitit 2025 dhe ka një sipërfaqe prej 324 m². Ai përbëhet nga katër klasa mësimore, një hapësirë për mësimdhënësit, një hapësirë ndihmëse dhe nyje sanitare. Hapja e këtij objekti paraqet një përmirësim të kushteve infrastrukturore për zhvillimin e procesit edukativo-arsimor dhe krijon kushte më të përshtatshme për nxënësit dhe personelin shkollor të kësaj njësie.
Në shkollën qendrore në Bojanë, mësimi nga klasa e parë deri në klasën e nëntë zhvillohet në gjuhën shqipe. Mësimi në gjuhën shqipe zhvillohet gjithashtu edhe në shkollat periferike në Llaskarcë dhe Paniçarë. Në njësinë shkollore në Paniçarë, procesi mësimor organizohet në paralele të kombinuara, sipas organizimit të përcaktuar nga shkolla.
Gjatë veprimtarisë së saj shumëvjeçare, Shkolla Fillore Komunale „Ibe Palikuqa” ka arsimuar shumë gjenerata nxënësish, një pjesë e të cilëve kanë arritur rezultate të mira në gara dhe aktivitete të ndryshme në nivel komunal, të qytetit të Shkupit, republikan dhe më gjerë. Këto rezultate dëshmojnë për kontributin e shkollës në zhvillimin arsimor dhe edukativ të nxënësve dhe në jetën e komunitetit lokal.

MOTOJA e shkollës sonë është :
„„Dituria na ndriçon rrugën, vlerat na ndërtojnë të ardhmen!““